Sunday, August 16, 2009

الف مبروك




يمكن الفيلم مختلف عن توقعاتنا زى ما عودنا احمد حلمى
هى قصه مش جديده بس بتلمس احساس انسانى هائل

الفيلم قصته بأختصار بتدور حول

شخص انانى مبيفكرش غير فى نفسه وشكله واحتياجاته الخاصه وبس
شخص رافض مجرد النظر لاحوال دنيته او حتى اهله
ناجح فى علاقاته مع الناس وفى شغله والحياه ماشيه تمام
لكن عمره ما فكر فى بعدين 

ولا فى احتياجات الاخرين

عايز يجوز 

ابوه هو المتكفل بيه وبمصاريف جوازه وشقته 
ومش مهم ابوه هيجب الفلوس منين
عمره ما سأل عن امه ولا عن احوالها
عمره ما فكر يصاحب اخته او حتى يسألها مالك
شخص عايش لنفسه وبس

بيبتدى القدر يلعب لعبته معاه
واليوم اللى قبل فرحه بيتمنى امنيه انه يعيش 100 سنه
وتانى يوم اللى هو يوم الفرح 

بيبتدى اليوم يتعاد بنفس الاحداث
لحد ما تيجى الساعه 12 وينتهى اليوم بموته 

ويصحى تانى يوم على نفس الاحداث
وبيفضل كل يوم يغير فى الاحداث علشان يوصل لحل
عشان ينتهى الفيلم بعد اعاده كذا يوم بانه يضحى بنفسه عشان اسرته تعيش



فكره الفيلم اللى المفروض المشاهد يوصلها فى الاخر
هى انه كان شخص انانى جدا .. لكن القدر قرر انه يغير منه
عشان كده كان اليوم بيتعاد 

ولما يبقى فى حاجه متصلحتش او مخدش باله منها بيتعاد تانى
فى اخر يوم قدر " حلمى " انه يغير شخصيته تماما 

ويبقى انسان حنون ومتفاهم وعنده استعداد لمساعده الغير
لكن كان مكتوب عليه انه كده كده هيموت فى يوم فرحه
يعنى القضاء والقدر مش ممكن نغيره لانه هيجى هيجى 

لكن نقدر نغير الواقع ونخلى العالم بتاعنا مختلف
مينفعش نشيل ايدينا من احوال الدنيا ونكبر دماغنا ونقول ادينا عايشين
احنا اللى نقدر نخلى اللحظه اللى بنعيشها حلوه او وحشه


-----------------------


عمرك فكرت انك فى يوم ممكن تصحى من نومك تلاقى اليوم بيتكرر
ممكن تكون دى بعيده شويه
لكن اوقات تعدى علينا فترات ونقول ان التاريخ بيعيد نفسه
يعنى تلاقى احداث حصلت فى حياتك بتتكرر تانى 

ممكن مع اختلاف الشخصيات لكن هى هى نفس الاحداث
نفس المواقف بتتكرر ونفس ردود الافعال 

ونفس الاحباطات والمطبات اللى فى حياتك
ايه فايده ان الاحداث تتكرر ؟؟


هل ده معناه ان الحياه بتنبهنا لحاجه معينه
اننا مثلا بنعالج مشاكلنا بطريقه غلط
او تفكيرنا هو اللى غلط
ولا يمكن هو ده الوقت اللى المفروض تعمل فيه تغير لحياتك وتغير للواقع

طب لو فرضنا انك غيرت الواقع وغيرت الاحداث
او على الاقل حاولت
لكن وصلت النتيجه لنفس المكان
هل ده معناه انك مجبر تعيش الواقع ده حتى لو حاولت تغيره ومعرفتش
ولو ده قدر .. يبقى كان ايه فائده ان الاحداث تتكرر طالما مجبرين نعيشه
اكيد الاحداث بتتكرر عشان نتعلم منها حاجه
لكن لو فرضنا انك اتعلمت وقلت انا هغير دنيتى 

وبرضو وصلت النتيجه لنفس المكان
هل ده معناه ان فى قوه اكبر مننا هى اللى بتتحكم فينا
واننا لازم نتقبل ده بشكل عادى جدا ونتعايش معاه
حد فاهم حاجه ؟؟

------------------------------


مينفعش الواحد يبقى متسرع فى الحكم على الحاجات والشخصيات اللى قدامه
ودى كانت نقطه بيحاول الفيلم يلفت انتباهنا ليها بردو
لازم تسمع من الاطراف اللى قدامك قبل ما تفكر تجرحهم بكلمه او تسئ الظن فيهم
بص حواليك كويس 

اكيد فى ناس بيحبوك بس انت مش واخد بالك من وجودهم
او يمكن محاولتش تهتم بيهم

لازم تفكر بهدوء فى كل المشاكل والحلول
اهم حاجه التفكير .. لان ربنا ميز الانسان بالعقل
والعقل موجود عشان نعرف نفكر وندبر ونخطط 

مش عشان نعيش الدنيا بلامبالاه

------------------



ما اعظم ان تكون غائبآ حاضر

بدلا من ان تكون حاضرآ غائب

كانت اخر جمله قالها حلمى فى الفيلم
فعلا ممكن نكون موجودين بين الناس لكن ملناش اهميه
لكن بيبقى احساس حلو اوى لو غبت لحظه ولقيت الناس لحظوا غيابك
ده معناه انك سبت بصمه جوه قلوبهم وده الاهم
والا هتعيش وتموت وكانك معشتش فى الدنيا
ببساطه مش هتلاقى حد يفتكرك 

سواء كنت حاضر او غايب

-----------

كلمه ل " حلمى " ... انت بجد فناااااان
مع ان الفيلم اوله كوميديا رائعه
الا انك خلتنا نبكى فى اخره
صعب انك تخرج من فيلم اليومين دول وتبقى حاسس انك ممكن تغير حياتك من خلال فكره فى فيلم

6 comments:

مشاكس said...

بوست روعة يا كوكى والله

فى ناس كتير قوى مفهمتش ان الفلم هدفه انك ممكن تتغير وتبقى ايجابى وتغير واقع حياتك بس مش ممكن تغير قدرك الى انه يموت فعلا الفلم اثر فيا قوى والله بوست فى الجون
-

Alice said...

انت بتبعتيلي البوست ده ليه
قصدك تقولي ايه <_<

Alice said...

في ناس مهما حاولت مبتعرفش تفكر غير في نفسها
مهما حصل ومهما جري بيفضلوا يفكروا في نفسهم بس ..

safa7_karmooz said...

ايه ده

طلعتى بتفكرى وعقلك كبير اهوة :p

Bondoka said...

كل سنه وانتى طيبه
يا جميل
حلوه فكره الفيلم .. بس كده حرقتيهولى قبل مااشوفه
:)
بس ولا يهمك هتفرج تانى

رمضان كريم

hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله