Wednesday, February 24, 2010

.......

سعات بتعدى علينا أوقات
ممكن تكون قصيرة اوووى
لكن بنفضل فاكرينها طول حياتنا
فاكرينها بكل تفاصيلها
حجات ليها تأثير
ممكن نفتكرها ونضحك او ندمع 

او نتمنى ان الوقت يقف عندها وميعديش

اصل اللى جه بعدها .. اصعب

.........................................

سعات بنحب ناس
يستاهلوا او ميستاهلوش مش ده المهم
المهم انهم بيفضلوا محفورين جوانا
علمونا حجات كتيره
ممكن نكون اتجرحنا منهم او جرحناهم
مش هتفرق .. مهو فى طرف اتجرح و السلام
بس عمرنا ما هننساهم



حتى لو مرت علينا ملايين السنين

.................................................

سعات بحس انى بلف فى دايره مقفوله
وان الاحداث بتتكرر هى هى بنفس نهاياتها
بس لحد دلوقتى وبعد سنين مقدرتش اعرف العيب فى مين ولا ايه الغلط
بحاول اغير كل حاجه فى كل مره

بس واضح ان القدر مبيتغيرش

...........................................

سعات بنحاول نغير من اشخاص بنحبهم
نغير من طباعهم او شكلهم
او نديهم دفعه لقدام ممكن تخليهم احسن
حتى لو كان فيها جزء من التضحيه واننا نيجى على نفسنا عشان يبقوا افضل

بس ايه الهدف او ايه النتيجه إذا كان الحد ده نفسه مش عايز يتغير ؟؟

.............................................

ازاى نقدر نواجه الواقع ونتحداه رغم عناده المستمر لينا وتكسيره لأحلامنا
ومعاه احساسنا الداخلى المستمر بالضياع والانكسار
ازاى ننور شمعه فى ليل عاصف وممطر
سعات مبينفعش نعاند اكتر من كده

ممكن نكون ببساطه واقفين فى المكان الغلط

.......................................

فى ناس بتقول ان كل انسان بيبقى ليه جزئين فى حياته
جزء حلو وجزء وحش

يعنى لو عشتت حياتك فى اولها تعب وضيقه 

ربنا هيفتحها عليك ويعوضك فى نصها التانى .. والعكس بردو

هى دى الدنيا .. يا تاخد حلوها الاول يا تاخد الوحش

الغريب بقى ان فى ناس حياتهم اولها بيبقى زى اخرها 

هو مش حرام يعيشوا حياتهم كلها فى شقى

............................................

مش سهل انك تلاقى احساس حلو
ومش سهل انك لو لقيته تقدر تحافظ عليه
خصوصا لو حد من الطرفين جبان
ممكن يكون بيحب لكن معندوش الشجاعه الكافيه عشان يعترف بكده
خصوصا لو كان اتجرح قبل كده

بس هو مش المفروض ان اللى اتجرح وجرب الاحساس ده ميحاولش يجرح ؟؟

..............................................

مره حد سألنى مين قدوتك فى الحياه
فكرت شويه واستغربت جدا
لقتنى مش لاقيه اى حد ممكن اعتبره قدوة
وكان السؤال اللى محيرنى .. ليه ؟؟
كل انسان وهو صغير بيبقى ليه قدوه بتكبر معاه

طب انا ليه مليش ؟؟

No comments: